John 15
E Isu Ia a Kai a Vain
1“Iau kunana a manga a kai a vain muholi. E Tata i manga a mari ni leho na hania na vain. 2 aI paku vuroki a maka rahagu ri uka a kanene ria. Pali a rahagu ranga ri tahoka kanena, bara i kisi kamumu ria, ri vua hateka. 3Mua mu kabakaba pali na matana Vure, a vuhuna mu longo mai a ngava a taki mua vona. 4Mu rihi iau i manga iau a rihi mua. A rahana vain i tuvu tala na bokona kai, a vain bara i tahoka a kanena. Pali a rahana vain ni tolo tala na bokona kai a vain, i uka ma ge tahoka a kanena. Mua ranga, na tahuna i uka ma mu rihi iau, bara i uka kanene mua.5“Iau kunana a bokona kai a vain, pali mua a rahana. E huriki ri rihi iau, iau tara a rihi ria, ria kunana ri gi vakabele a kanene ria ge kupo. E huriki i uka ma ri rihi iau, bara ri keri ni rata a maki. 6 bNa tahuna a viri i uka ma i rihi iau, i manga a rahana kai ni tolo vuroki ge malai. Muri bara ni voro rike na kanono, ri nono. 7Na tahuna mu rihi iau, mu muri mai a ngavagu, bara mu nanea e Tata na ningaru ne mua, bara i longo. 8 cNa tahuna mu vakabele a kanene mua i kupo mu vakasiri mua, mua e huriki a murimuri nau, lakea mu ratea a rane Tata i dagi na malala.
9“Iau a ngaru mua i manga e Tata i ngaru iau. Ngane a ngaru hateka mua mu gu rihi iau, ga ngaru mua. 10 dMua bara mu longototo a ngavagu, bara ngaru mua, i manga kunana a longototo a ngavane Tata, lakea i ngaru iau. 11A taki mua vona a ngava iea, mu gu vivi manga iau a vivi, bara mu vivi liu. 12 eA vinara nau i maea: Mu vangaru i manga iau a ngaru mua. 13 fA viri i ngaru hateka e huriki a turana, lakea i mate na murine ria, a ningaru vona i dagi hateka. 14 gMua bara mu muri mai a vinara nau, bara mua e huriki a turagu. 15Ngane i uka ma ga gale mua tabu ge mua a vora, a vuhuna a vora i uka ma i lohoka vona a leho i rata a bakovi dagi vona. Ngane ga gale mua, mua e huriki a turagu, a vuhuna a maki lobo e Tata i vakasiri iau vona a tovo polo lobo ne mua pali. 16Mua i uka ma mu vulaki iau. Iau a vulaki mua. A vulaki mua mu gu vano, mu gu vakabele a kanene mua ge tabuli vakaroro. Mua bara mu rata mavonga, e Tata bara i habi ne mua a ra maki mu nanea vona na ragu. 17 hA vinara nau i maea: Mu vangaru!
E Huriki Bara Ri Marikoi ne Huriki a Murimuri
18“Na tahuna e huriki na malala ri marikoi ne mua, mu luhoi kamumu. Re huriki nga ri marikoi nau muga. 19 iBara i mua a bakovi na malala, e huriki a bakovi na malala bara ri ngaru mua, a vuhuna mua a tara ne ria. Pali mua, i uka ma mua a bakovi na malala. A vulaki tala mua ne huriki a bakovi na malala lakea ri marikoi ne mua. 20 jMu luhoi mulea a ngava a taki mua vona, ‘A vora i uka ma i muga na matakari vona.’ E huriki ri rata hale iau, bara ri rata hale mua. E huriki ri longo mai a vinara nau, bara ri longo mai a vinara ne mua. 21Ri rata mavonga mua, a vuhuna ri marikoi nau. Ri marikoi nau a vuhuna i uka ma ri lohoka vona a viri i rudu iau a valai. 22Ngane ri tahoka a ngava a vuhuna iau a valai a pukatala a naro hale ne ria. Ngane ri uka a dala ri gi ruhulolo a naro hale ne ria. 23 kA viri i marikoi iau, i marikoi ne Tata. 24Iau a made turane ria, a rata a maka maki nga i uka tara viri ge rata ma. Iau i uka ma ga rata a maka leho nga, bara ri uka rarenga vona a naro hale ne ria. Pali ngane ri matai a maka nivakasiri nga, ri tabana ni marikoi maria e Tata. 25 lRi rata mavonga, ge bele muholi a ngava ni here puru hosi na Vinara i ta maea, ‘I uka a vuhuna a hini ri marikoi tavula nau.’26 m“Na tahuna a viri ge tuhori mua ge valai, ra Hanu na Nita Muholi, bara i vakalongo e huriki nau. Ra viri iea, ga rudu vilia ne mua, bara i valai ne Tata. 27Mua ranga bara mu vakalongo e huriki ne nau, a vuhuna mu made turagu na tahuna a vakatubu a leho, i valai i harena mona.
Copyright information for
BNP